ХЕНДИРБЕ СЫЙ ШАНЧАР ОЮН

Май 31-де Эрзин кожууннуң Эрзин сумузунга Тускайлаттынган шериг операциязының маадыры, Республиканың "Хендирбе сый шанчар" оюннарының дөрт дакпыр тиилекчизи Кыргыс Айдыс Артуровичиниң чырык адынга автомашина шаңналдыг маргылдаа болуп эрткен. 

 Ук оюнну Кыргыс Айдыс Артуровичтиң өг-бүлези, Эрзинниң спортшколазы база Тыва культура төвү демнежип удуртуп эрттирген. Хемчегниң кол аалчылары - Бурят Республиканың национал оюннар федерациязының даргазы Зурбаков Гомбо Найданович баштаан бөлүк болган. 

 Маадырывыс Айдыс Кыргыс чаңгыс эвес удаа "Алтан Мундарга" деп Делегей чергелиг бурят чоннуң эрттирип турары фестивальдың киржикчизи болуп чораанын демдеглевес арга чок. 

Автомашина шаңналдыг оюнга ниитизи-биле 63 хендирбечи бүгү Тывадан киришкен. Изиг-изиг оюннуң түңнелинде шаңналдыг черлерни дараазында киржикчилер чаалап алганнар: 

 1-ги черни - Буддаев Булат Романович, 23 харлыг, Улуг-Хем кожууннуң төлээзи; 

 2-ги черни - Дирчинчап Дозураш Геннадьевич, 16 харлыг, Эрзин кожуун; 

 3-кү черни - Монгуш Омак Ооржакович, 41 харлыг, Каа-Хем кожуун; 

 4-кү черни - Дапый-оол Алексей Владимирович, 47 харлыг, Тес-Хем кожуун. 

 1-ги черни чаалап алган киржикчи Буддаев Булат автомашинаны шаңнал кылдыр алгаш, дарый Маадырның оглунга белек кылдыр дамчыдып кааны чараш чорук кылдыр көстүп, төөгүге балалбас исти арттырган. 

Тыва чоннуң бурун оюнун ара кагбайн ойнап чоруур тура-соруу бедик, каң дег чудуруктуг оолдарывыска мөгейип, быжыг кадыкшылды күзедивис! https://vk.com/wall-20358661_86843