2026 чылда Тывага «Көдээ суурнуң тренери» программа ажылдап эгелээр

Тываның 50 муңдан эвээш чурттакчылыг черлеринге ажылдаар дээн күш-культура болгаш спорт талазы-биле специалистерге 1 млн. рубльди төлээр. Республика Баштыңы Владислав Ховалыгның дыңнатканы-биле алырга, республика 2026 чылда «Көдээ суурнуң тренери» федералдыг программага каттыжып, суурлар болгаш биче хоорайларже тускай мергежилдиг күш-культура болгаш спорт специалистерин хаара тудар.

«Көдээ девискээрлерни хөгжүдери - Тыва Республиканың Чазааның мурнады көөр угланыышкыннарының бирээзи. Көдээ инфраструктураны, ооң иштинде социал адырны хөгжүдеринче угланган федералдыг программаларга идепкейлиг киржип, регионалдыг санал-оналдарны киирип, боттандырып турар бис» - деп, Владислав Ховалыг бодунуң блогунда регионнуң «Көдээ черниң тренери» программага киржилгени дыңнаткан.

Программаның киржикчилерин мөөрей-биле шилиир. Олар тренер-башкы ажылды чорудар күш-культура болгаш спорт талазы-биле ортумак азы дээди тускай эртемниг болур ужурлуг. Тренерниң хостуг олудунуң конкурс шилилдезин эрткен специалист-биле организацияга 5 чыл ажылдаарын хүлээндирген күш-ажыл керээзин чарар.

Президент Владимир Путин «Көдээ черниң тренери» программаны саналдап кииргенин Владислав Ховалыг сагындырган. Программаның киржикчилери 1 млн. хире рубльдиң хары угда бээр төлевирин алыр. Бо төлевилел көдээ суурларга ажылдаар специалистерни хаара тудар сорулгалыг «Көдээ суурнуң башкызы», «Көдээ суурнуң фельдшери» төлевилелдер-биле дөмей. https://rtyva.ru/press/tuva-news/6147/