Танцы-самга ынакшылды сөңнээн

Республиканың бүгү школаларынга болгаш немелде өөредилге төптериниң бөлгүмнеринге неделя дургузунда Башкының хүнүнге уткуштур #мээң_ынак_башкым челлендж үргүлчүлээнин Республиканың немелде өөредилге хөгжүлдезиниң төвү дыңнаткан. Кызыл хоорайның 9 дугаар гимназиязында немелде өөредилге төвүнүң уруглары боттарының ынак башкыларының дугайында бижээн.

- Мээң ынак башкым Надежда Александровна Тыртык-Кара болур. Ол – танцы башкызы. Школавыста «Өзүмнер» уругларның хореографтыг каттыжыышкынының удуртукчузу болгаш хореограф. Башкым профессионал болгаш чогаадыкчы аргалары-биле танцыны сонуургаар кылдыр мени өөреткен. Ол кезээде деткимчениң болгаш макталдың сөстерин тып алыр, ынчангаш чаа-чаа бедиктерже үнүп, бергелерге дүжүп бербес дээш кызыдар мен.

Надежда Александровнаның танцы-самга ынаа өөреникчилеринге база дамчып турар. Башкывыстың кызымаккай болгаш мергежээни-биле көскү чедиишкиннерлиг болган бис. Янзы-бүрү мөөрейлерге тиилеп, шаңналдыг черлерни ээлеп турар бис – деп, 10 «в» класстың өөреникчизи, «Элээди журналист» бөлгүмнүң кежигүнү Элина Багымба челленджте бижээн.

https://vk.com/wall-38636573_53791