Вы здесь
Республика чергелиг "Кажыкка аът чарыштырар" оюннуң түңнелдери
19.09.2025, 15:22 1104 просмотра
2025 чылдың 7 айның 8,9 хүннеринде Чөөн-Хемчик кожууннуң Ийме сумузунуң Кум-Сууга «Алдын кажык» деп Регионалдыг тыва оюннар фестивалы болуп эрткен. Ооң иштинде улуг черни «Кажыкка аът чарыштырары» деп оюн ээлээн. Кол шаңналы – «Лада гранта» деп автомашина болган. Ук оюннуң тиилекчизи, автомашинаның эдилекчизи Иргит Сергей Сергеевичиниң шаңналдарынга бѳгүн республика чергелиг оюн Ондар Коңгар-оол аттыг Тыва үндезин культура төвүнге болуп эрткен.
Мөөрейге киржири-биле Тере-Хөл, Мөңгүн-Тайга, Тожу, Улуг-Хем, Тес-Хем кожууннарындан болгаш Кызыл хоорайдан ниитизи-биле 16 киржикчилер боттарының күжүн шенеп маргылдаалажып ойнааннар.
Түңнелинде, кажык оюнунга шылгараан эң-не тергиин, кашпагай Мөңгүн-Тайга кожууннуң төлээзи Созур-оол Виталий богба шаңналынга төлептиг болган. Дараазында 2-ги черни Тожу кожууннуң төлээзи Дүмендей Айлаң чаалап алган.Тес-Хем кожууннуң төлээлери Эрендей Алдын-оол, Булак Алдынай база Седен Чечена 3-кү, 4-кү, 5-ки черлерниң байзазынче киргеннер.
Мөөрейниң киржикчилеринге Тыва үндезин культура төвүнүң мурнундан чылыг-чымчак байырны чедирбишаан, моон-даа соңгаар ам-даа улуг чедиишкиннерни күзеп, хей-аъдыңар бедик, угаан-медерелиңер оккур, салып алган сорулгаңар кезээ шагда бүдер болзун деп йѳрээр-дир бис!
База ол ышкаш хүндүлүг Сергей Сергеевичиге өгбелерден дамчып келген тыва улустуң мерген угааны, эрес-кашпагай чоруу сиңген «Кажык» оюнун кадагалап арттырарынга, ооң сайзыралынга улуг үлүг-хууну кииргени дээш ѳѳрүп четтиргенивисти илередип тур бис. Буянныг ажыл-ижи ѳскелерге үлегерлиг чижек болуп, ам-даа сайзыраар-ла болзун! Курай-курай!
