«Зарница 2.0» шериг-патриотчу оюннуң регионалдыг чадазынга Бай-Талдың бичии школачылары бирги черни ээлээн

«Зарница 2.0» шериг-патриотчу оюннуң регионалдыг чадазы 55-ки гвардейжи даг-адыгжы бригаданың девискээринде болуп турар. Шупту салгалдарның ынак оюну - «Зарница 2.0» бо удаада чаа хевирде, чурагайлыг технологияларны ажыглавышаан, бедик шынарлыг эртип турар. 7-ден 10 харлыг уруглар ортузунга баштайгы маргылдаалар эрткен. Республика чергелиг маргылдаада тус черниң тиилекчилери чыглып келген. Тываның барык шупту кожууннарындан 16 команда киришкен. Ооң иштинде ырак-узак кожууннар безин бар: Мөңгүн-Тайга, Бай-Тайга, Тожу, Өвүр, Сүт-Хөл дээш оон-даа өске. Командалар байырлыг чыскаалга, «Бирги дуза», «Лазертаг», «Шериг хептиг маадырлар», «Снайпер» спортчу оюнга күжүн шеневишаан, төрээн чуртунуң төөгүзүнге хамаарышкан айтырыгларга харыылааннар. Шериг-патриотчу оюннуң регионалдыг чадазының биче бөлүүнге бирги черни Бай-Тайга кожууннуң Бай-Тал школазының школачылары бүзүрелдии-биле чаалап алган. Ийиги черни Чеди-Хөл кожууннуң командазы, үшкү черни Барыын-Хемчик кожууннуң школачылары ээлээннер. «Зарница 2.0» шериг-патриотчу оюннуң регионалдыг чадазы бедик деңнелге эрткен. Башкылар болгаш партнёрларывыс маргылдааның эки талаларын демдеглээннер. Шериг-патриотчу оюн бүдүн май ай дургузунда болур. Дараазында ортумак, улуг бөлүктер база тускай командалар ортузунга маргылдаалар үргүлчүлээр. Тиилекчилер Сибирь федералдыг округка болур маргылдааларга республиканы төлээлээр» - деп, организакчыларның бирээзи, Тывада Баштайгылар шимчээшкининиң удуртукчузу Эртине Куулар демдеглээн. 

Чуруктар Движение Первых | Тыва https://vk.com/wall-38636573_50591