Кайгамчык салым-чаяанныг ус-шевер Оюн Омак Михайловичиниң шеверлеп кылган ажылдарын сонуургадыр-дыр бис

Апрель 23-те 12:00 шакта Тыва үндезин культура төвүнге алгы-кештен кылыглар даараарының талазы-биле универсал мастер, республика болгаш делегей чергелиг конкурстарның тиилекчизи, «Тыва национал бөрттер даараарының технологиязы» деп бөлгүмнүң удуртукчузу, тыва национал хеп даараар салым-чаяанныг ус-шевер Оюн Омак Михайловичиниң хууда делгелгези болуп эртер.

 Чон караанга көзүлбес-даа болза, кончуг шеверлер бистиң аравыста хөй. Оларның бирээзи Оюн Омак Михайлович. Ол тыва үндезин идик-хептиң, бөрттүң келир үези дээш сагыш-човап чоруур кижилерниң бирээзи. Харын-даа үндезин тыва национал бөрттүң сайзыралынга улуг үлүг-хуузун киирип чоруур. Тыва бөрттерниң чайын-даа, кыжын-даа, байырлалдар-даа үезинде кедер хевирлерин шуптузун, база ол ышкаш хам кижиниң бөргүн база даарап турар. Алдар аттыг мөгелер, хөөмейжилер, ус-шеверлер, багжылар дээш оон-даа өскелер бөрттерни Омак Михайловичиге хөйү-биле чагыдып даарадып турар. Омак Михайлович ындындан ук-төөгүзүнден салым-чаяанныг ус-шевер, ооң ажылдары кайгамчык шевергин, шынарлыг, онза хевирлиг. Оон аңгыда, ус-шевер тайга-сынче үнгеш, Оран-Таңды ээлеринге чүдүп, сүзүктеп, тейлеп, саңын салып чоруур. Омак Михайлович бөрттү даарап олургаш, ишти-хөңнүнден эки чүүлдерни бодап, чагыдып алыкчының кылып чоруур ажыл-ижинге улуг чедиишкиннерни күзеп, йөрээп турарын ол демдеглеп чугаалаан.

 Бүгү чонувусту делгелгениң ажыдыышкыынче чалап тур бис. Тываның ховар салым-чаяанныг ус-шевериниң кылган ажылдарын ийи карааңар-биле көрүп, сонуургаңар.

https://vk.com/wall-64833533_25810