Вы здесь
Төлевилел «Чаңгыс дыл – чаңгыс кижизидикчи башкы»
16.02.2025, 23:14 1531 просмотр
Кызылдың 30 дугаарлыг уруглар садынга февральдың 13-тен 15-ке чедир республиканың кижизидикчи башкыларының болгаш тыва дыл башкыларының аразынга «Чаңгыс дыл – чаңгыс кижиздикчи башкы» төлевилелдиң күүселдези-биле школа назыны четпээн уругларның ийи дылдыг өөредилгезин болгаш кижизидилгезин хөгжүдеринге «Школа назыны четпээн уругларның башкыларының профессионал компетенциязы» деп профессионалдыг билиг бедидер курсту Национал школа хөгжүдер институт эрттирген.
Ук төлевилел 2025 чылдың сентябрь 1-ден эгелеп чамдык уруглар саттарынга эксперимент кылдыр боттанып эгелээр. Келген башкылар Федералдыг, регионалдыг хоойлулар болгаш дылдың хөгжүлдезин чурумчудуп, хайгаараарынга хамаарышкан хоойлулар-биле танышканнар.
Школа назыны четпээн уругларның ийи дылдыг болурунуң ажыктыының дугайында институттуң улуг специализи Альбина Монгуш солун илеткелди кылган. Амгы үеде «Билингвизм» ийи дылга арыг чугааланып билири болгаш оларны аңгы-аңгы байдалдарда ажыглап билириниң дугайында илеткелди институттуң удуртукчузу Елена Куулар келген башкыларга номчаан. «Кижи» болгаш «Дыл» деп мөзү-шынар сүзүктериниң дугайында билиишкинни Тываның Өөредилге яамызының специализи Урана Допул чедимчелиг тайылбырлаан.
Билиин бедидип келген башкылар дараазында мындыг хевирлиг өөредилгелер ам-даа болурун манап артканнар.
