Вы здесь
Тыва дыл хүнүнде "Уран чүүлдүң күзүнгүзү" фестиваль-мөөрей тыва дыл кырынга шиилерни көрүкчүге бараалгаткан
01.11.2024, 23:04 1782 просмотра
Беш шак чартык иштинде алды шиилерни чүгле тыва дыл кырынга - фестивальдың ийи дугаар хүнүнде шиилерин Эрги-Барлыктың, Хову-Аксының, Чадаананың, Алдан-Маадырның, Шагаан-Арыг хоорайның, Мугур-Аксы суурнуң бот-тывынгыр театр бөлүктери көргүскен. Драмаларда болгаш комедияларда ынакшылды, өг-бүле харылзаазын, акы-дуңмалышкы хамаарыглаларны болгаш социал айтырыгларны көргүскен.
Улуг улустуң бот-тывынгыр театрларының аразынга болган мөөрейниң түңнелинде Гран-При шаңналын болгаш 30 муң рубль түңнүг сертификатты Чөөн-Хемчик кожууннуң Мерген-Херел Монгуш аттыг культура бажыңы "Сес үүлгедиг" деп шиизи дээш алган.
Тускай шаңналдар:
"Тергиин режиссура" - Алдын-Ай Сат Мөнгүн-Тайга кожууннуң культура болгаш дыштанылга төвүнүң "Мен дириг мен" деп драмазы дээш
"Тергиин роль" - Милана Биче-оол, Мөңгүн-Тайга кожууннуң культура болгаш дыштанылга төвүнүң "Мен дириг мен" деп драмазынга кол ролю дээш
"Тергиин ийиги роль" - Алевтина Доржукай, Шагаан-Арыг хоорайның "Элдеп-шоу" театр студиязының "Диирең" деп комедиязында ролю дээш база Айрана Эренчин, Чеди-Хөл кожуундан "Таңды-Уула" культура бажыңының "Кыйгы" деп драмада ролю дээш
"Поэтиктиг дыл" - Эрги-Барлык суурнуң улусчу театры "Ынакшыл болгаш килең дугайында ыры" деп драмазы дээш
"Чидиг социал теманы сойгалааны дээш" шаңналга Алдан-Маадыр суурнуң "Самбажык" аттыг бот-тывынгыр театрының "Амыдыралдың эскиттери, азы ховунуң Хамнаарактары" драмазы төлептиг болган.
Фестиваль-мөөрейниң бүгү-ле киржикчилеринге Тыва дыл хүнүнде театр байырлалын сөңнээни дээш улуу-биле четтиргенивисти илередип, байыр чедирип, келир үеде улуг чедиишкиннерни күзедивис!
